الكتاب فكرته جميلة جدا وخطرت على بالي زمان بس أنا كسلت أطبقها .. فاتكتبت خلاص لعمر حلال عليه :) .
في واحد صاحبي قال حكمة عجبتني .. قال لي ما فيش حاجة اسمها شخص مبدع وآخر غير مبدع ، لكن في شخص نفذ الفكرة أول ما فكر فيها وشخص آخر كسل ينفذها.فكرة كويسة إنك تسمع الأغنية الخاصة بكل قصة وانت بتقراها .. مع أول أغنية في الكتاب بتاعت فاكراك لنجاة علي لقيتني مش عارفها فشغلتها من يوتيوب أثناء القراءة وهكذا مع كل أغنية .. ما اعتقدش إن سماع الأغنية أثناء قراءة القصة ممكن يخلي الإحساس مختلف لأن الوحيد اللي هيحس القصة ويربطها بالأغنية هو عمر طاهر اللي عاشها فعلا .. ودا اللي خلى أكتر الآراء اللي قيمت الكتاب قالوا إن الكتاب تجربة شخصية جدا ومرتبطة بصاحبها فقط .. يعني أنا مثلا لما أسمع أغنية قال جاني بعد يومين مش هترتبط معايا بالموقف اللي حكاه عمر في الكتاب لما البواب كان هيلبسه قضية تحرش :) .
عجبني جدا في الكتاب حواره مع العربية .. قمة الإبداع والاستمتاع.
عجبني كمان قصة أغنية الكون كله بيدور لمحمد منير لأني أصلا بحبها جدا وبحب ألبوم شبابيك كله، فده كان كفيل إنه يهيأني إني أحب القصة من قبل ما أقرأها .
تحياتي للمبدع دائمًا عمر طاهر :) .
ليست هناك تعليقات:
إرسال تعليق